मुंबई फिल्म कंपनी आणि झी स्टुडिओजची निर्मिती
जिनिलीया व रितेश देशमुख यांच्या मुंबई फिल्म कंपनी आणि झी स्टुडिओज यांची निर्मिती असलेला आदित्य सरपोतदार दिग्दर्शित ‘फास्टर फेणे’ हा सिनेमा २७ ऑक्टोबरला सिनेप्रेक्षकांच्या भेटीला येत आहे.
या चित्रपटातील प्रोमोशनल गाण्याचे अनावरण अलीकडेच करण्यात आले. या धमाल ‘फाफे’ गाण्याला पत्रकार परिषदेत उस्फुर्त प्रतिसाद मिळाला. या कार्यक्रमाला ‘फास्टर फेणे’ अर्थांत अमेय वाघ, गिरीश कुलकर्णी, पर्ण पेठे, सिद्धार्थ जाधव, चिन्मयी सुमीत, बालकलाकार शुभम मोरे, लेखक क्षितिज पटवर्धन, दिग्दर्शक आदित्य सरपोतदार, संगीतकार अर्को यांची उपस्थिती लाभली.
‘फास्टर फेणे’ या पात्राला ट्रिब्युट म्हणून या चित्रपटाचे निर्माते रितेश देशमुख यांनी या प्रोमोशनल गाण्याची संकल्पना मांडली. स्वतः रितेश देशमुख यांनी या गाण्याला स्वरबद्ध केले आहे आणि ते आपल्या खास नृत्यशैलीत प्रेक्षकांना भुरळ घालण्यास सज्ज आहेत. सर्वसामान्य प्रेक्षकांची पावलं थिरकायला लावणाऱ्या या गाण्याला संगीतबद्ध केले आहे, हिंदी चित्रपटसृष्टीतल्या प्रसिद्ध संगीतकार अर्को मुखर्जी यांनी तर गाण्याचे गीतकार प्रशांत इंगोले यांनी आपले शब्द या गाण्याला दिले आहेत. अर्को यांनी कपूर & सन्स, बरेली कि बर्फी, रुस्तम यांसारख्या अनेक हिंदी चित्रपटांतीळ गाण्यांना संगीत दिले आहे. त्यांच्या या मराठीतल्या त्यांच्या पहिल्याच प्रयत्नाला भरभरून प्रतिसाद मिळेल अशी आशा त्यांनी कार्यक्रमात व्यक्त केली. सुप्रसिद्ध कोरिओग्राफर सीझर गोन्साल्विस यांनी खास शैलीत नृत्यदिग्दर्शन केले आहे.
या कार्यक्रमात रितेश देशमुख म्हणाले, फास्टर फेणे हा चित्रपट माझ्या हृदयाजवळचा चित्रपट आहे. हे मी माझं भाग्य समजतो कि मला ‘फास्टर फेणे’ मोठया पडद्यावर घेऊन येण्याची संधी मिळाली. हे गाणे फास्टर फेणे करिता फक्त माझ्याकडून ट्रिब्युट नसून तो फास्टर फेणे ह्या पात्रावर प्रेम करणाऱ्या प्रत्येकाकडून आहे. ह्या फिल्मचा जॉनर लक्षात घेता ह्यात गाण बसवणं कठीण होतं परंतु मला प्रमोशनल गाणं करण्याची आणि ते गाण्याची संधी मिळाली याचं खरंच समाधान आहे.’