‘हृदयांतर’ चित्रपटातून मराठी सिनेसृष्टीत पदार्पण करणारा सुपरस्टार हृतिक रोशन या सिनेमाचा ट्रेलर लाँच करणार आहे.
हदयांतर सिनेमाव्दारे फॅशन डिझाइनर विक्रम फडणीस मराठी सिनेसृष्टीत आपलं निर्माता-दिग्दर्शक म्हणून पाऊल ठेवतोय. त्यामुळे आपल्या मित्राच्या सिनेमात काम करताना हृतिक रोशन खूप खुश आहे. त्याने या सिनेमाच्या रिलीजची तारीख ही ट्विटरव्दारे जाहीर केली होती. आणि आता २८ मे रोजी होणाऱ्या या सिनेमाच्या ट्रेलर लाँचलाही हृतिक रोशन हजेरी लावणार आहे.
सूत्रांच्या अनुसार, हृदयांतर सिनेमाच्या ट्रेलर लाँच सोहळ्याविषय़ी सांगताच, हृतिकने या कार्यक्रमाला आपण उपस्थित राहण्याविषयी सांगितलं. हृतिक आणि विक्रम यांची मैत्री खूप जुनी आहे.
विक्रम फडणीस म्हणतो, ‘हृतिक रोशन या सिनेमात असल्याने ही आमच्यासाठी अभिमानाची गोष्ट आहे. हृतिकने नेहमीच या ना त्याप्रकारे हृदयांतरला सपोर्ट केलाय. त्यामुळेच हृतिकच्या हस्ते हृदयांतर चित्रपटाचा ट्रेलर लाँच होणं ही आमच्या संपूर्ण हृदयांतरच्या टीमसाठी खुप महत्वाची गोष्ट आहे. हा आमच्यासाठी एक स्पेशल दिवस असणार आहे.’
टी-सीरिज प्रस्तुत, टोएब एन्टरटेन्मेटच्या सहयोगाने बनलेला, यंग बेरी एन्टरटेन्मेट, इम्तियाज खत्री आणि विक्रम फडणीस प्रॉडक्शन निर्मित आणि विक्रम फडणीस दिग्दर्शित ‘हृदयांतर’ चित्रपटात मुक्ता बर्वे, सुबोध भावे आणि सोनाली खरे मुख्य भूमिकेत दिसणार आहेत.