मॅारिशसमध्ये कोण ठरणार ‘अजिंक्यातारे’

खिळली नजर २२ ऑगस्टच्या सोहळ्यावर!

मॅारिशसला साजरा होणाऱ्या ‘अजिंक्यतारा’ पुरस्कार सोहळ्याची तयारी सुरू झाली असून मराठी चित्रपटसृष्टीतील एकूण ३१ विभागांसाठी नामांकने जाहीर झाले आहेत. त्यातील अजिंक्यातारे कोण ठरणार यावर मराठी चित्रपट सृष्टीची नजर खिळली असून, २२ ऑगस्टला  पुरस्कार सोहळ्यात विजेतेपदाची माळ कोणाच्या गळ्यात पडणार, याविषयी सर्वानाच उत्सुकता आहे.
‘सुपरविस्टा एंटरटेण्मेंट’ आयोजित ‘अजिंक्यतारा’ पुरस्कार सोहळ्याची चित्रपट विभागाची नामांकने एका रंगतदार कार्यक्रमात जाहीर करण्यात आली आहेत. एका पंचतारांकित हॉटेलमध्ये हा सोहळा पार पडला. या सोहळ्याला मराठीतील अनेक कलाकारांची उपस्थिती होती. अंतिम फेरीसाठी ‘एलिझाबेथ एकादशी’, डॉ प्रकाश बाबा आमटे, किल्ला, या चित्रपटांमध्ये चुरस आहे; सर्वोत्कृष्ट अभिनेत्याच्या पुरस्कारासाठी नाना पाटेकर (डॉ. प्रकाश बाबा आमटे : द रिअल हिरो), सचिन खेडेकर (नागरिक), सुमीत राघवन (संदुक), यांच्यात चुरस आहे. सर्वोत्कृष्ट नायिकेसाठी अमृता सुभाष ( किल्ला), नंदिता धुरी (एलिझाबेथ एकादशी),  सोनाली कुलकर्णी (डॉ. प्रकाश बाबा आमटे : द रिअल हिरो) यांना नामांकन मिळाले. सर्वोत्कृष्ट दिग्दर्शनासाठी अभिजीत पानसे (रेगे), अविनाश अरुण (किल्ला), परेश मोकाशी (एलिझाबेथ एकादशी) यांचे नामांकन करण्यात आले आहे.
इलेक्ट्रोनिक मतदान पद्धतीने पुरस्कारपात्र कलाकृतीची व कलाकारांची निवड परीक्षकांनी केली असून यासाठी भरत दाभोळकर, महेश कोठारे, नीना कुलकर्णी, भरत जाधव, अलका कुबल, अशोक पत्की, वैशाली सांमत यांनी परीक्षक म्हणून काम पाहिले आहे. इंडिपेंडेट वेलिडेशन एजन्सीच्या माध्यमातून ही निवड प्रक्रिया पार पडणार आहे. मॅारिशसला होणाऱ्या पुरस्कार सोहळ्यात इंडिपेंडेट वेलिडेशन एजन्सीतर्फे या निवड प्रक्रियेचा खुलासा करण्यात येईल.  प्रेक्षक पसंतीच्या पुरस्कारासाठी ऑनलाईन वोटिंग ठेवण्यात आली असून www.ajinkyataraawards.com. या वेबसाईटवर प्रेक्षकांना आपलं मत नोंदवता येणार आहे. लोकप्रिय अजिंक्यतारा चित्रपट, लोकप्रिय अजिंक्यतारा अभिनेता व लोकप्रिय अजिंक्यतारा अभिनेत्री या तीन विभागासाठी प्रेक्षक पसंतीचा पुरस्कार ठेवण्यात आला आहे.
‘अजिंक्यतारा’ या आगळ्या वेगळ्या ग्लॅमरस पुरस्काराची ब्रँड अॅम्बेसेडर लोकप्रिय अभिनेत्री सई ताम्हणकर आहे.  पुरस्कार सोहळ्यांतून करमणूक विश्वातल्या गुणवत्तेचं कौतुक होत असतंच पण नव्या येणाऱ्या टॅलेंटला वाव देण्यासाठी सुपरविस्टा एंटरटेण्मेंट’ कंपनीच्या माध्यमातून ३१ जुलैला स्पर्धा आयोजित करण्यात आली होती. यातून नृत्यासाठी सोनाली पवार गायनासाठी हरिसिंग ठाकूर, व प्रतीक बसवराज सलगर या तीन युवा गुणी कलाकारांची निवड झाली असून मॅारिशसला होणाऱ्या पुरस्कार सोहळ्यात या तिघांना चित्रपटसृष्टीतल्या कलाकारांसोबत परफॉर्म करण्याची संधी मिळणार आहे.
अजिंक्यतारा’ या आगळ्या वेगळ्या पुरस्कार सोहळ्याची अनुभूती घेण्यासाठी चित्रपटसृष्टी उत्सुक असून या पुरस्कार सोहळ्यात पुरस्कारांमध्ये बाजी कोण मारणार? याबाबत अनेक अंदाज वर्तवण्यात येत आहेत. प्रवासादरम्यान होणाऱ्या प्रदूषणावर उतारा म्हणून जेवढं इंधन खर्च होईल. तेवढे वृक्ष लावण्याचा अनोखा उपक्रमही या सोहळ्याच्या निमित्ताने केला जाणार आहे. हे पुरस्कार २२ ऑगस्टला मॅारिशसच्या स्वामी विवेकानंद कन्व्हेशन सेंटर येथे चित्रपटसृष्टीतील मान्यवरांच्या उपस्थितीत समारंभपूर्वक प्रदान करण्यात येणार आहेत. मराठी चित्रपटसृष्टीचे डोळे या वर्षांतील पहिल्यावहिल्या ‘अजिंक्यतारा’ पुरस्कार सोहळ्याकडे लागले आहेत.