तर्काच्या खुंटीवरून निसटलेलं रहस्य

नाटककार आणि साहित्य अकादमी विजेते कथाकार जयंत पवार यांची ‘तर्काच्या खुंटीवरून निसटलेलं रहस्य’ ही वेगळ्या रूपबंधाची आणि आशयाची दीर्घ कथा साहित्य वर्तुळात चर्चिली गेली. या कथेच्या अभिवाचनाचा रौप्यमहोत्सवी प्रयोग मुंबईत १ एप्रिल २०१६ रोजी रात्री ८ वाजता यशवंत नाट्य मंदिर, यशवंत नाट्यसंकुल, मनमाला टँक, माहीम येथे मान्यवरांच्या उपस्थितीत होणार आहे.

‘तर्काच्या खुंटीवरून निसटलेलं रहस्य’ या कथेच्या अभिवाचनाचा एक अभिनव प्रयोग प्रसिद्ध रंगकर्मी अतुल पेठे गेले काही महिने महाराष्ट्रभर करत आहेत. पेठे यांच्या या वैशिष्ट्यपूर्ण प्रयोगालाही सर्वत्र जाणकारांकडून दाद मिळाली आहे. पेठेंनी या अभिवाचनाचे प्रयोग आजवर पुणे, मुंबई, नाशिक, औरंगाबाद, नागपूर, कोल्हापूर, गडहिंग्लज, रत्नागिरी, बेळगाव येथे केले आहेत.

‘नाटकघर’ या संस्थेतर्फे होणाऱ्या या प्रयोगास मुंबईच्या ‘अस्तित्व’ या संस्थेचे सहाय्य लाभले आहे. या प्रयोगाची प्रकाशयोजना प्रदीप वैद्य यांनी केली आहे. प्रयोगाचा कालावधी दीड तास असून, त्याच्या प्रवेशिका प्रयोगाच्या आधी दोन तास नाट्यगृहावर उपलब्ध होतील.