ठाण्यात बघा ५०० हून अधिक दुर्मिळ मासे

जोशी बेडेकर महाविद्यालयात अनोखे प्रदर्शन

देशातील विविध भागांमध्ये गेल्या सहा वर्षांमध्ये यशस्वीपणे प्रदर्शनांचे आयोजन केल्यानंतर ‘अॅक्वा लाईफ’ पुन्हा एकदा ठाणे येथे दाखल होत आहे. लौकिक क्रीएशन्सच्या माध्यमातून जोशी बेडेकर कॉलेज, चेंदणी बंदर रोड, ठाणे (पश्चिम),येथे २६ ते २९ मे दरम्यान सकाळी १० ते रात्री ९ वाजता ५००हून अधिक मासे बघता येणार आहेत.

या प्रदर्शनात १०० हून अधिक फिश टँक असतील आणि ५००च्या वर माशांच्या प्रजाती प्रदर्शनात मांडल्या जातील. ज्या दुर्मिळ जाती प्रदर्शनात असतील त्यांत ट्रिगर फिश, लायन फिश, पिवळ्या शेपटीचे डॅमसेल्स, निळे डॅमसेल्स, स्टिंग रे, माता टँक, ग्रीन विंग सार्जंट, मून रेस, चेकर बोर्ड रेस, सोनेरी डोक्याचा गोबी, मूरीश आयडॉल, व्हीम्पल, ब्लूरिंग एंजल, कुराण एंजल, ब्राऊन इल, क्लाऊन फिश, स्टोन फिश, बॅट फिश, फायर क्लाऊन आणि यलो बटरफ्लाय यांचा समावेश आहे.

मत्स्यप्रेमींना या प्रदर्शनात माशांच्या दुर्मिळ प्रजाती पाहायला मिळणार आहेत. त्यांत फ्रान्टोसा, जिओफेगस, पँटानो बँडेड लेपोरीनस, रॉटकिएल सेवरम्स, सँटानोपेरेका, पोल्लेनी, व्हीएजा रीगेन, अॅलीगेटर गार, अॅरोप्रियाना, ग्रे जायंट गुरामी, शॉवेल नोज कॅटफीश, टू रेड अॅरोवाना, ब्लॅक घोस्ट आणि इतरही दुर्मिळ आकाराच्या माशांचा समावेश आहे.

“अशा प्रकारच्या प्रदर्शनांचे आयोजन करून त्या माध्यमातून दुर्मिळ अशा जातींबद्दल तसेच इतरही प्राण्यांबद्दल रसिकांमध्ये असलेली जिज्ञासा शमविणे हे उद्दिष्ट असते. त्याशिवाय युवकांमध्ये समुद्रजीवनाबद्दल प्रेम निर्माण करणे, हा हेतूही त्यातून साध्य होतो,”असे उद्गार अॅक्वा लाईफ या प्रदर्शनांचे आयोजक असलेल्या लौकिक क्रीएशन्सचे लौकिक सोमण यांनी काढले.

या प्रदर्शनामध्ये जलजीवनाबद्दलची इत्यंभूत माहितीही या क्षेत्रातील प्रेमींना मिळणार आहे. त्यासाठी प्रशिक्षित स्वयंसेवकांची नियुक्तीही या प्रदर्शनात केली गेली आहे. गेली सहा वर्षे या प्रदर्शनाचे आयोजन देशाच्या विविध भागांमध्ये केले जात आहे. देशाच्या कोणत्याही भागात हे आयोजन केले गेले तरी त्याला उत्तम असा प्रतिसाद मिळतो. यावेळी ठाणे येथील मत्स्य आणि समुद्रजीवप्रेमींसाठी हे आयोजन केले गेले आहे. या अनोख्या प्रदर्शनासाठी प्रवेशशुल्क मात्र ७० रुपये एवढे ठेवण्यात आले आहे.

स्थळ : जोशी बेडेकर कॉलेज, चेंदणी बंदर रोड, ठाणे (पश्चिम),