दृष्टिहीन मुलांचा ‘योग उत्सव’

जागतिक योग दिवसाचे औचित्य साधून नयन फाउंडेशन आणि नेत्र ग्रुपच्या सयुंक्त विद्यमाने योग उत्सव साजरा केला. जगात प्रथमच योग दिन दृष्टीहीन मुलांनी साजरा केला म्हणून ‘लिम्का बुक ऑफ रेकॉर्ड्स’मध्ये या कार्यक्रमाची नोंदणी करण्यात येणार आहे.

या कार्यक्रमात धर्मदाय  उपआयुक्त सुवर्णा खंडेलवाल, समाजकल्याण आयुक्त अविनाश देवसाठवार, मुंबई महानगर पालिका साह्यक आयुक्त उदयकुमार शिरोडकर प्रमुख पाहुणे म्हणून उपस्थित होते.

आगामी मराठी सिनेमा ‘यारों की यारी’ आणि ‘मेड इन महाराष्ट्र’ या सिनेमाच्या कलाकरांनी योग उत्सवाला उपस्थित राहून दृष्टिहीन मुलांना शुभेच्छा दिल्या.

नयन फाउंडेशन ही दृष्टिहीनांसाठी कार्यरत असणारी सेवाभावी संस्था असून, वेगवेगळे सामाजिक उपक्रम राबवत असते. दृष्टिहीन मुलांना समाजात एक वेगळी ओळख प्राप्त व्हावी तसेच त्यांच्यातील विविध कलागुणांना वाव मिळावा यासाठी गेली ७ वर्ष नयन फाउंडेशन काम करत आहे. आतापर्यंत नयनच्या वतीने दृष्टिहीन बांधवासाठी गिर्यारोहन, बुद्धिबळ स्पर्धा, क्रिकेट स्पर्धा, दृष्टिहीन विद्यार्थांचं पहिलं गोविंदा पथक असे विविध उपक्रम राबवले आहेत.

नयन फाउंडेशनचे अध्यक्ष पुन्नलगर देवेंद्र हे स्वतः अंशतः दृष्टिहीन असून ते योगाचे प्रशिक्षक आहेत. त्यांनीच योग दिन साजरा करण्याच ठरवलं.  ११ डिसेंबर २०१४ रोजी सयुंक्त राष्ट्र संघात २१ जून हा जागतिक योग दिन म्हणून साजरा व्हावा यासाठी १९७ सदस्यांनी एकमताने हा ठराव पारित केला. सयुंक्त राष्ट्रसंघात भारताचे पंतप्रधान नरेंद्र मोदींनी योग हा फक्त शारीरिक व्यायाम नसून आत्मिक चिंतनाच साधन आहे अस सांगून योगाचं महत्व अधोरेखित केलं होतं.

या कार्यक्रमात दृष्टिहीन मुलांचे विविध सादरीकरण बघायला मिळाली. त्यामध्ये गणेश वंदन, मल्लखांब, रोप-मल्ल खांब, जल-दीप आसन, क्रिया जल, व्युतक्रमा, व्यग्रकारिणी, नौली, अशा विविध योगाच्या क्रियांच प्रात्येक्षिके दृष्टिहीन मुलांनी सादर केली.