‘झिंगाट’नंतर ‘जय चिंगाबुंगा’चा माहोल

‘डिस्को सन्या’ या आपल्या पहिल्याच मराठी चित्रपटाद्वारे निर्माते, संगीतकार आणि लेखक सचिन पुरोहित- अभिजीत कवठाळकर हे एंटरटेन्मेंटचे कम्प्लिट पॅकेज असलेला, एकसे बढकर एक कम्पोझिशन, दर्जेदार अन् तरुणाईला वेड लावेल अशी गाणी घेऊन अवतरले आहेत.

‘डिस्को सन्या’विषयी बोलताना सचिन पुरोहित म्हणाले की, ‘मी व माझे कुटूंब गेल्या सहा वर्षांपासून समाजापासून वंचित व अनाथ मुलांच्या सर्वांगीण विकासासाठी कार्य करीत आहोत. अनाथ म्हणून समाजाकडून होत असलेली पिळवणूक, जीवनातील दुःख, संकटे यांचा होत असलेला सततचा मारा अशा परिस्थितही या मुलांची जीवन जगण्याची जिद्द माझ्या मनाला चटका लावून गेली. त्यांच्यातील ही जिद्द म्हणजेच चिंगाबुंगा स्पिरीट होय. हा विषय मी माझे सहकारी निर्माते अभिजीत कवठाळकर यांच्याकडे काढला असता अनाथ व वंचित मुलांमधील ही जिद्द चित्रपटातून लोकांसमोर आणण्याचे आम्ही ठरविले आणि त्याचवेळी डिस्को सन्याचा जन्म झाला. परंतु ही एक उपदेशात्मक कथा न ठेवता व्यवसायिक दर्जाची फॅमिली एंटरटेनर व प्रेक्षकांना खिळवून ठेवणारी फिल्म असावी हे ठरवूनच डिस्को सन्याची निर्मीती केली आणि त्यात आम्ही यशस्वी झालोय, असं मला वाटतं. तसेच ही फिल्म प्रेक्षकांना नक्कीच भावेल, अशी मला खात्री आहे.’

बॉलिवूडचे ‘महानायक’ अमिताभ बच्चन यांच्यासोबत ‘भूतनाथ रिटर्न्स’ सिनेमात रूपेरी पडदा गाजवून राष्ट्रीय पुरस्कारांवर आपले नाव कोरलेला महाराष्ट्राचा लाडका ‘वंडर किड’ पार्थ भालेराव ‘डिस्को सन्या’ या मराठी सिनेमातून पहिल्यांदाच लीड रोलमध्ये दिसणार आहे.

या चित्रपटात एकूण ३ गीते व एक प्रमोशनल सॉंग आहे. ‘सर्व धर्म समभाव’ असा संदेश देणाऱ्या ‘जय हरी विठ्ठला, अल्लाह हू अकबर’ या गाण्यात बॉलिवूडमध्ये सुपरहिट गाणे देणारे गायक शबाब साबरी (प्रथमच मराठीत) यांच्या सुफी स्टाईलच्या जोडीला प्रख्यात लोकशाहीर नंदेश उमप यांच्या लोकसंगीताचा वापर करून आगळीवेगळी संगीतरचना केली गेली आहे. त्याचप्रमाणे सुप्रसिद्ध गायक आदर्श शिंदे यांच्या आवाजातील ‘साधं माझं रूप’ या मराठमोळ्या गाण्याला दक्षिण भारतातील पारंपारिक वाद्यांचा ताल देण्याचा नवा प्रयोग करीत दाक्षिणात्य वादकांकडूनच ‘तारा तपट्टाई’ या वाद्याचा सुरेख वापर या गाण्यात करण्यात आला आहे. विशेष म्हणजे महाराष्ट्रात हे वाद्य वाजविण्यासाठीच्या मर्यादा लक्षात घेता थेट चेन्नाई येथे या गाण्यांचे रेकॉर्डिंग करण्यात आले आहे.

चित्रपटातील सर्व गाणी ही दिग्दर्शक नियाज मुजावर यांच्या शब्दात सजलेली आहेत. यातील ‘चिंगाबुंगा’ या गाण्यातून आदर्श शिंदे व रिषभ पुरोहित हे सर्व प्रेक्षकांना आपल्या तालावर थिरकविणार, यात काही शंका नाही. पूर्वी चित्रपटातील गाणे हुबेहुब वाटावे यासाठी जसे दिलीप कुमारसाठी रफी, राजेश खन्नासाठी किशोरकुमार, मिथुन चक्रावरतीसाठी विजय बेनेडिक्ट ई. समीकरणे ठरलेली असायची त्याचप्रमाणे इथेही गायक रिषभ पुरोहीत यांचा आवाज बालकलाकार पार्थ भालेराव याच्या आवाजाशी मिळताजुळता असल्यामुळे गाण्यात पार्थ स्वतः गात असल्याचा भास होतो व याचा आनंद प्रेक्षकवर्ग नक्कीच घेतील.

प्रत्येकालाच ठेका धरायला लावणारे चित्रपटाचे प्रमोशनल सॉंग ‘आला बघा डिस्को सन्या’ हे फुल ऑन गाणं अवधूत गुप्ते यांनी गायले आहे.

चित्रपटातील संगीताच्या बाजाबद्दल आपल्या कल्पना नेमक्‍या काय होत्या, हे सांगताना अभिजीत कवठाळकर म्हणाले की, ‘सध्या पारंपारिक संगीतातून निर्माण केलेल्या नव्या संगीत रचनांना चित्रपट रसिकांकडून तितकी जास्त पसंती मिळत नाही. म्हणूनच कथा पुढे घेऊन जाणारी गाणी निर्माण करून प्रेक्षकांना गुंतवून ठेवण्यासाठी व त्यायोगे मनोंरजन व्हावे यासाठी गाण्यांचे बीट्स, चाली, शब्दांमध्ये नव्या रचना आणि प्रयोग करून एक आगळीवेगळी ट्रीटमेन्ट देण्याचा प्रयत्न आम्ही या चित्रपटातून केला आहे. सरतेशेवटी आम्हाला जे आवडलं ते करण्यात आम्ही यशस्वी झालो, असे मला वाटते. मात्र आता प्रेक्षकांना किती आवडेल हे पाहण्याची उत्सुकता आहे’.

या सिनेमातील डायलॉग दिग्दर्शक नियाज मुजावर यांचे असून सिनेमाची कथा व पटकथा नियाज मुजावर, सचिन पुरोहित व अभिजीत कवठाळकर यांची आहे. तसेच झी म्यूजिक कंपनीने या चित्रपटातील गाणी रिलीज केली आहेत. पार्थ भालेराव आणि अभिनेता संजय खापरे ही नवी जोडी या सिनेमाच्या निमित्ताने पहायला मिळणार आहे. तसेच अभिनेत्री चित्रा खरे, गौरी कोंगे, अभिनेते सुहास शिरसाठ, उमेश जगताप यांच्याही भूमिका वाखाणण्यासारख्या आहेत.

संदीप पाटील यांनी छायांकनाची जबाबदारी सांभाळली आहे. भौमिक शहा यांनी या सिनेमासाठी कोरिओग्राफर म्हणून काम पाहिले आहे. सिद्धार्थ तातुस्कर यांनी कला-दिग्दर्शन सांभाळलंय तर वेशभूषा पूर्ती कुलकर्णी, रंगभूषा संतोष गिलबीले आणि संकलन मिलिंद दामले यांनी केलंय.