१४ जुलैला येतेय रंगभूमीवर!
‘प्रेम नाम है मेरा प्रेम चोप्रा’ व ‘प्रपोजल’ या यशस्वी नाटकानंतर निर्माती कल्पना विलास कोठारी रंगनील प्रॉडक्शनच्या बॅनरखाली ‘अतिथी देवो भव:’ हे नर्मविनोदी नाटक घेऊन येत आहेत. या नाटकाचा शुभारंभाचा प्रयोग गुरुवार दि. १४ जुलैला दुपारी ४ वाजता शिवाजी मंदिर, दादर येथे होत आहे.
या नाटकाचे दिग्दर्शन सुप्रसिद्ध दिग्दर्शक विजय केंकरे यांनी केले असून, वैभव अर्जुन परब यांनी लेखन केले आहे. गेली अनेक वर्ष नाट्य व चित्रपटसृष्टीत यशस्वीरित्या कार्यरत असलेले दिग्दर्शक विजय केंकरे यांचं हे नाटक म्हणजे धमाल मनोरंजन असणार हे ओघाने आलंच. पण मनोरंजनाबरोबरच एक चांगला संदेशही या नाटकाद्वारे प्रेक्षकांना मिळणार आहे.
‘अतिथी देवो भव:’ असं आपण जरी वरवर म्हणत असलो तरी घरी आलेले पाहुणे आपल्याला नकोसेच असतात; पण काही अतिथी हे देवासारखे असतात आणि जाताना स्मृती ठेवून जातात. ‘अतिथी देवो भव:’ या नाटकात हेच दाखविण्यात आले आहे.या नाटकाची कथा आप्पा नेने यांची आहे. आप्पा नेनेंच्या मुलीचं लग्न मोडलेल्या घरात साखरपुड्याच्या आदल्या दिवशी भाऊ मालवणकर हा पाहुणा अचानक आलेल्या पावसाप्रमाणे हजर होतो. आणि पुढे काय गंमत होते हे प्रत्यक्षात नाटकात पाहायला मिळेलच. लग्न संस्कृतीवर आधारित प्रत्येकाला विचार करायला लावणारं हे एक हलकं फुलकं विनोदी नाटक आहे. घराघरात घडणारा हा विषय असून हसता हसता अंतर्मुख करणारं हे नाटक सर्वच वयोगटातील प्रेक्षकांचं उत्तम मनोरंजन करील असा निर्माते – दिग्दर्शकांना विश्वास आहे.
‘गेला माधव कुणीकडे’, ‘दिनूच्या सासूबाई राधाबाई’, ‘लग्नाची बेडी’, ‘साष्टांग नमस्कार’, ‘सारखं छातीत दुखतय’ या नाटकातून उत्कृष्ट अभिनयासाठी ओळखले जाणारे प्रतिभावंत अष्टपैलू अभिनेते विनय येडेकर बर्‍याच कालावधीनंतर या नाटकात प्रमुख भूमिका करीत आहेत. प्रसिद्ध अभिनेते राजन भिसे यांचीही यात महत्वपूर्ण भुमिका असून विनय येडेकर व राजन भिसे यांच्या अभिनयाची जुगलबंदी या नाटकात पाहायला मिळणार आहे. सध्या सुरू असलेल्या स्टार प्रवाहवरील ‘दुहेरी’ या मालिकेतून घराघरात पोहोचलेली अभिनेत्री लेखा मुकुंद यांचीही यात भूमिका आहे. सोबत मोहन साटम, ऋषिकेश दळी, अमर कुलकर्णी हे लोकप्रिय कलाकार या नाटकात इतर भूमिकेत आहेत.या नाटकाचे पार्श्वसंगीत नितीन कायरकर यांचे असून नेपथ्य प्रदीप सुळे, सहाय्यक दिग्दर्शक निलेश रानडे, समीहा सुळे, प्रकाशयोजना राजन ताम्हाणे, वेशभूषा मंगल केंकरे, प्रसिद्धी दिपक जाधव यांची असून सुत्रधार गोट्या सावंत हे आहेत.
चांगली संहिता, उत्तम अभिनेते, नेत्रसुखद नेपथ्य, संगीत आणि दिग्दर्शन या सर्व बाजूंनी परिपूर्ण असं हे नवीन धम्माल नर्म विनोदी नाटक ‘अतिथी देवो भव:’ प्रेक्षकांचं मनोरंजन करण्यास येत आहे.
