१९ ऑगस्टपासून सर्वत्र प्रदर्शित होणार
‘आय एम नॉट स्लमडॉग आय एम इंडियन’ हा मराठी चित्रपट येत्या १९ ऑगस्टपासून संपूर्ण महाराष्ट्रात प्रदर्शित होत आहे. स्वस्तिक फिल्म्स इंटरनेशनल प्रस्तुत या चित्रपटाची निर्मिती राजन डोगरा यांनी केली आहे. अभिनयासोबतच दिग्दर्शनाकडे वळलेल्या युगने या चित्रपटात भारतातील वास्तव दाखवले आहे.
एका धाडसी, धडाकेबाज, जीगरबाज तरूणावर ‘आय एम नॉट स्लमडॉग आय एम इंडियन’ची कथा आहे. त्या तरुणाची भूमिका युगने स्वतः साकारली आहे. हा चित्रपट प्रत्येक भारतीयाच्या मनात धगधगत असलेला अंगार पडद्यावर मांडणारा असल्याचं युगचं मत आहे. समाजातील सर्व घटकांचा या चित्रपटात सर्वांगाने विचार करण्यात आला असल्याने जसा हा चित्रपट तरूणांसाठी आहे, तसाच जेष्ठांसाठीही असल्याचं युग मानतो. आंतरराष्ट्रीय पातळीवर आजवर केवळ भारताच्या गरिबाचंच दर्शन घडवण्यात आलं आहे. आपल्या देशाचं खरं रूप कधीच पडद्यावर आलेलं नाही. या चित्रपटात तेच काम करण्यात आल्याचं युग मानतो.निर्माते राजन डोगरा यांनी सांगितले, की आपल्याकडे जे चांगलं आहे त्याचं दर्शन या चित्रपटात प्रेक्षकांना घडेल. एका आशयघन कथानकाला गीत-संगीत आणि अभिनयाची जोड देऊन हा चित्रपट बनवण्यात आला आहे. मनोरंजनासाठी लागणारा संपूर्ण मसाला जरी या चित्रपटात असला तरी हा केवळ मसालापट नाही. यात एक संदेशही दडलेला आहे. याच कारणामुळे सर्व गटातील प्रेक्षकवर्गाला हा चित्रपट आपलासा वाटेल. युगने अभिनयासोबत दिग्दर्शन करीत संपूर्ण टिमला घेऊन एक दर्जेदार चित्रपट बनवला आहे. आजच्या तरुणाईला पाठिंबा दिला तरच त्यांच्यात दडलेले कलागुण जगासमोर येतील. हा चित्रपट अनेक तरुणांसाठी मार्गदर्शन करणारा ठरेल याबाबत शंका नाही.
कथा-पटकथालेखन, दिग्दर्शन, संवादलेखन, गीतलेखन आणि नृत्य दिग्दर्शनाच्या जोडीला युगने या चित्रपटात मुख्य भूमिकाही साकारली आहे. त्याच्या जोडीला यात उषा नाडकर्णी, उदय सबनीस, राजन राणे, शामलाल नावत, उमेश बोळके, अजहर भट, नीलांबरी, दुर्गेश नाबर, तेजस मानकर, स्वकीत, स्वप्निल मोरे, अतुल, वामन परब, अनिल, कुणाल नाईक, शीतल कुलकर्णी, अमर गिरी, राजन, वेन्डोला, जॉय यांच्याही भूमिका आहेत.सुरेश देवन यांनी या चित्रपटाचं छायालेखन केलं आहे. कुणाल नाईक कार्यकारी निर्माता, एस. नंदागावले निर्मिती प्रमुख, तर संदिप कांबळे सहाय्यक आहेत. जीत कळके आणि प्रकाश मोरे यांनी या चित्रपटाचं पार्श्वसंगीत केलं आहे. बबन अडागळे यांनी कलादिग्दर्शन केलं असून महादेव दळवी यांनी रंगभूषा केली आहे. महेश नारकर या चित्रपटाचे वेशभूषाकार आहेत.
