मराठी कलावंत खेळणार ‘महालगोरी’

लगोरी म्हंटलं की सर्वानाच आपले बालपण आठवते. या खेळाशी प्रत्येकाचे काही ना काही नाते असतेच. लगोरी .. डिकोरी… लगूरी अशा अनेकविध नावानी या खेळाला ओळखले जाते. ‘लगोरी’ हा महाराष्ट्राचा पारंपरिक खेळ आहे, असे म्हंटले तरी वावगे ठरणार नाही कारण याचे काही पौराणिक संदर्भसुद्धा मिळतात. शिवाय  या खेळाला आता आंतरराष्ट्रीय मान्यताही मिळाली आहे.

‘महालगोरी’चे वैशिष्ट्य असे आहे कि यामध्ये खेळ आणि मनोरंजन यांचा अनोखा संगम पाहायला मिळणार आहे. आपले मराठी कलाकार यामध्ये भाग घेणार आहेत. आठ टीम्स आणि त्यांचे कॅप्टन अशी यांची विभागणी असेल. प्रत्येक टीमच नाव एका किल्ल्यावर आधारित असेल.  या टीम्स च्या माध्यमातून महाराष्ट्रातील किल्ल्याना प्राधान्य देण्याचा प्रयत्न आयोजकांचा आहे. याच बरोबर विजेत्यांच्या बक्षिसाची रक्कम किल्ल्यांचे संवर्धन  करणाऱ्या एनजीओला देण्यात येणार असून, किल्ल्यांची साफसफाई आणि चांगली व्यवस्था ठेवणाऱ्या एनजीओला मदत करण्याचा आयोजकांचा हेतू आहे.

उद्घाटनप्रसंगी प्रसाद ओक आणि संजय नार्वेकर यांनी रंगमंचावर लगोरीचा खेळ खेळून सामन्याला सुरुवात केली. या क्रीडा मालिकेचे शीर्षक गीत संगीतकार रोहन – रोहन यांनी केले आहे.

संजय जाधव, प्रसाद ओक, संजय नार्वेकर, अभिजित पानसे, सोनाली कुलकर्णी, स्मिता गोंदकर, हेमांगी कवी, केदार शिंदे, संग्राम साळवी, आदिनाथ कोठारे, मनीषा केळकर, श्रुती मराठे  असे अनेक मान्यवर कलाकार खेळणार आहेत.

रांगडा रायगड,  सरखेळ सिन्धुदुर्ग, अभेद्य अकलूज,  नरवीर सिंहगड,  पावन पन्हाळा,  सरदार शिवनेरी,  झुंजार राजगड,  बुलंद प्रतापगड.