देवेंद्र नाईक यांच्या छायाचित्रांचं ६ डिसेंबरपासून प्रदर्शन
सुप्रसिद्ध छायाचित्रकार देवेंद्र नाईक यांनी टिपलेल्या छायाचित्रांचं ‘डिस्टींक्ट कल्चर्स‘ हे एकल छायाचित्रप्रदर्शन जहांगीर आर्ट गॅलरी, टेरेस गॅलरी, महात्मा गांधी मार्ग, काळा घोडा, मुंबई ४०० ००१ येथे *भरविण्यात* येणार आहे. सदर प्रदर्शन दि. ६ ते १२ डिसेंबर २०१७ या काळात सकाळी ११ ते सायंकाळी ७ या वेळेत सर्व कलारसिकांना विनामुल्य खुलं राहील.
तृप्ती नाईक यांनी आयोजित केलेल्या या प्रदर्शनाचं उदघाटन पद्मविभूषण डॉ. अनिल काकोडकर यांच्या हस्ते होणार असून जहांगीर आर्ट गॅलरीचे चेअरमन आदी जहांगीर, छायाचित्रकार पद्मश्री सुधारक ओळवे, कलाप्रेमी रोशनी दमानीया, विशाल दुडेजा (व्यवस्थापक पीआर – द ललित इंटरनॅशनल) आणि कवी सतीश सोळांकुरकर हे प्रमूख पाहूणे म्हणून उपस्थित रहाणार आहेत. प्रदर्शनाचं उद्घाटन* ६ डिसेंबर रोजी सायंकाळी ५.३० वाजता होईल. 
छायाचित्रकार देवेंद्र नाईक यांनी देशभर फिरून भारतातील विविधरंगी संस्कृतीचा आणि तिथल्या ‘पारंपरिक’ वेशातल्या आणि नैसर्गिक वातावरणात वावरणार्‍या लोकांच्या प्रतिमा आपल्या कॅमर्‍याने टिपल्या आहेत. यात लडाखच्या धारचिक गावातील आर्यन लोक, जे स्वत:ला अलेक्झांडर द ग्रेटचे वंशज मानतात, त्या गावातील स्त्रियांचा समावेश आहे. तसंच ओडिशातील कोरापूट आणि मलकानगिरी जिल्ह्यांतील घनदाट जंगलात जाऊन तिथल्या संस्कृती, परंपरा आणि वारसा, त्यांच्या टिकाऊ जीवनशैलीचा अभ्यास करून देवेंद्र यांनी तेथील लोक निसर्गाशी कसे एकरूप झाले आहेत यावर प्रकाश टाकला आहे. प्रत्येक प्रतिमा ही त्या लोकांचा जगण्याचा सरळ मार्ग दाखवते आणि त्यांच्या डोळ्यात पाहिल्यास त्या प्रतिमेमागे लपलेली एक कथाच आपल्या समोर येते.
सदर प्रदर्शनाच्या आयोजक तृप्ती नाईक या छायाचित्रकार देवेंद्र नाईक यांच्या अर्धांगिनी असून त्या कलाकाराच्या प्रेरणास्त्रोत आणि मुख्य आधारस्थंभ आहेत. व्यावसायिक छायाचित्रकार म्हणून गेली अनेक वर्षं काम करणारे देवेंद्र नाईक फोटोग्राफीक सोसायटी ऑफ इंडियाचे आजीवन सदस्य असून त्याना पीएसआयचे सर्वोत्कृष्ट फोटोग्राफर आणि सर्वोत्कृष्ट छायाचित्रकार २०१३-१४ असे पुरस्कार प्राप्त झाले आहेत.
डिसेंबर २०१४ मध्ये त्यांचं ‘हिमालय- द ट्रँक्वॉईला लॅन्ड’ हे हिमालयाच्या भूप्रदेशाचं यथार्थ दर्शन देणारं प्रदर्शन जहांगीर आर्ट गॅलरीत प्रदर्शित झालं होतं. भारतभूमीचं स्वरूप, संस्कृती, परंपरा आणि वारसा यांचा अधिक शोध घेऊन कलारसिकांशी संवाद साधण्याची देवेंन्द्र यांची आस अजूनही कायम असून या पुढेही त्यांची अनेक छायाचित्रं रसिकांना पहायला मिळतील.
