सत्यजित वरेकर यांच्या रंगलेखनाचे प्रदर्शन
सुप्रसिध्द रंगलेखक सत्यजित वरेकर यांनी अलिकडच्या काळात साकार केलेल्या चित्रांचं ‘फोक गॅलोर हे चित्रप्रदर्शन मुंबईतील जहांगीर कलादालनात २७ सप्टेंबरपासून सुरु होत असून, ते ३ ऑक्टोबरपर्यंत सुरु राहणार आहे.
सांगलीच्या कलाविश्व महाविद्यालयात विद्यार्थ्यांवर कलेचे संस्कार करणारे तरुण रंगलेखक प्रा. सत्यजित वरेकर हे ग्रामिण जीवनाचं यथार्थ चित्रण करणारे कलाकार असून, वास्तवचित्रकलेकडे त्यांचा ओढा राहिला आहे. नंदीबैल आणि त्याला घेऊन फिरणारे लोककलाकार यांनी परिधान केलेले रंगीबेरंगी कपडे, नंदीच्या गळ्यात असलेल्या घंटा, कलाकुसरीच्या वस्तू, घुंगरु या सर्वांचा पगडा त्यांच्या बालमनावर बसला होता. त्याच बालपणीच्या आठवणीतला नंदी हा त्यांच्या प्रस्तूत प्रदर्शनाचा विषय आहे. महाराष्ट्राच्या ग्रामीण भागात नंदीला पुजलं जातं तसंच त्याला भगवान शिवाचं वाहन म्हणून मान दिला जातो. हाच मनात घर करून बसलेला नंदी वरेकर यांनी गेलं एक तप कॅनवासवर विविध स्वरूपात साकार केला आहे.
नंदी आणि त्याच्या मालकाचं हुबेहुब दर्शन आणि डोळ्यातले भाव पहात राहण्यासारखे आहेत. त्या दोहोंबधला भावबंध, जिवाभावाचं नातं आणि परस्पर विश्वास या चित्रांमधून अत्यंत समर्पकपणे रेखाटला गेला आहे. ‘प्रेम हेच जीवन आणि जगण्यासाठीच प्रेम’ हा संदेश या प्रदर्शनातून दिला गेला आहे. रंगलेखक सत्यजित वरेकर यानी तैलरंग, एक्रिलिक, चारकोल, ऑईल पेस्टल्स, जल रंग अशा अनेक रंगांचा सुयोग्य वापर करून ही चित्रं साकार केली आहेत. आजपर्यंत अनेक समूह आणि एकल कला प्रदर्शनांमधून त्यांनी आपल्या चित्रकृती मांडल्या असून त्या कलारसिकांच्या पसंतीस उतरल्या आहेत.
अनेक राष्ट्रीय कलासंस्था आणि राज्यसरकारकडून त्यांच्या चित्रांना पुरस्कार प्राप्त झाले असून देश विदेशातील प्रतिष्ठित व्यक्ती, संग्राहक आणि संस्थांच्या दालनांमध्ये त्याच्या चित्रकृती संग्रहित आहेत.
