अष्टपैलू जग्गू दादा यांची भावना
‘स्टार प्रवाह चॅनल सुरू झाल्यापासून अनेक मालिकांमध्ये मला अभिनय करण्याची संधी मिळाली. वेगवेगळ्या भूमिका करायला मिळाल्या. स्टार प्रवाह चॅनलनं मला स्टार बनवलं,’ ही भावना आहे ‘नकुशी’ या लोकप्रिय मालिकेतील चंदू ही व्यक्तिरेखा साकारणाऱ्या जगन्नाथ निवंगुणे यांची!
गेली २७ वर्ष नाटक, चित्रपट, टीव्ही मालिकांमध्ये अभिनेता जगन्नाथ निवंगुणे उर्फ जग्गू दादाने स्टार प्रवाहच्या ‘राजा शिवछत्रपती’, ‘अग्निहोत्र’, ‘मन उधाण वाऱ्याचे’, ‘लक्ष्य’, ‘नकुशी’ अशा सर्व गाजलेल्या मालिकांमध्ये महत्वपूर्ण रोल निभावले. या मालिकांतील त्यांच्या अभिनयाचं प्रेक्षकांनी कौतुकही केलं. राजा शिवछत्रपती या मालिकेतील कान्होजी जेधे, लक्ष्य मधील इन्स्पेक्टर वीरेंद्र कदम या त्यांच्या भूमिका विशेष गाजल्या. नकुशी मालिकेतील चंदू भाई ही खलनायकी भूमिका गाजते आहे.पोलिसांच्या आयुष्यावर आधारित ‘लक्ष्य’ या मालिकेतील इन्स्पेक्टरच्या भूमिकेनं मला स्टार बनवलं. या इन्स्पेक्टरला दोन स्टार होते. मात्र, स्टार प्रवाहनं मला फाईव्ह स्टार दिले. अशोक समर्थ, आदिती सारंगधर, कमलेश सावंत यांच्यासारख्या लोकप्रिय कलाकारांसह मलाही ओळख मिळाली,’ असं जगन्नाथ निवंगुणे यांनी सांगितलं. ‘स्टार प्रवाहनं मला नेहमीच वैविध्यपूर्ण भूमिका दिल्या. नकुशी या मालिकेत मला उत्तम अभिनेत्यांसह काम करता आलं. विशेषत: राष्ट्रीय पुरस्कार मिळवलेला अभिनेता उपेंद्र लिमये जो एक कलाकार म्हणून श्रेष्ठ आहेच, मात्र माणूस म्हणूनही संवेदनशील आहे. नकुशी या मालिकेत काम करण्याचा अनुभव मला समृद्ध करणारा आहे,’ असं त्यांनी आवर्जून सांगितलं.
