ब-याच मोठ्या ब्रेकनंतर मराठीत एक ग्रामीण कथा असलेला ‘झाला बोभाटा’ हा विनोदी सिनेमा येत आहे. नुकतच या सिनेमाचं ज्येष्ठ अभिनेते दिलीप प्रभावळकर यांच्या हस्ते एका दिमाखदार सोहळ्यात म्युझिक आणि ट्रेलर लॉन्च करण्यात आलं. यावेळी सिनेमातील सर्व कलाकार आणि तंत्रज्ञ उपस्थित होते.
अनुप जगदाळे दिग्दर्शित या सिनेमाची निर्मिती किंग क्रिएशन डिजी टेक्नो एण्टरप्राईजेस प्रॉडक्शनच्या साईनाथ राजाध्यक्ष आणि महेंद्रनाथ यांनी केली आहे. ६ जानेवारीला आपल्या जवळच्या चित्रपटगृहात “झाला बोभाटा” प्रदर्शित होणार आहे.
लॉन्चवेळी निर्माते साईनाथ राजाध्यक्ष म्हणाले की, ‘महेंद्रनाथ आणि मी सामाजिक आशय-विषय असलेला एक विनोदी सिनेमा केला आहे. आम्ही स्व:ताला नशीबवान समजतो की, आमच्या सिनेमासाठी आम्हाला इतकी चांगली आणि मोठी स्टारकास्ट मिळाली आहे.
लॉन्चवेळी निर्माते महेंद्रनाथ म्हणाले की, ‘जेव्हा अनुपने मला हे कथानक ऎकवले तेव्हाच या सिनेमावर काम करण्याचा निर्णय घेतला. मलासुद्धा या सिनेमात एक भूमिका करण्याची संधी मिळाली असून, प्रसिद्ध अभिनेते दिलीप प्रभावळकर यांच्यासोबत काम करण्याचा अनुभव अतिशय वेगळा होता.’
दिग्दर्शक अनुप जगदाळे म्हणाले की, ‘दिग्दर्शक म्हणून माझा पहिलाच सिनेमा आहे. तरीही दिग्गज कलाकारांकडून मला चांगली साथ मिळाली. मला विश्वास आहे की, प्रेक्षक आमच्या मेहनतीचं भरभरून कौतुक करतील आणि या सिनेमाला प्रतिसाद देतील.’
‘झाला बोभाटा’ या सिनेमात ज्येष्ठ अभिनेते दिलीप प्रभावळकर, भाऊ कदम, कमलेश सावंत, संजय खापरे, दीपाली अंबिकार, तेजा देवकर, मयुरेश पेम, मोनालिसा बागल, महेंद्रनाथ, बाळकृष्ण शिंदे, रोहित चव्हाण, रिना अग्रवाल, अश्विनी सरपुर, डॉ. साहिल, निलेश भोईर, रोहित साळवी यांच्यासारखे उत्तम कलाकार आहेत.
सिनेमाची कथा अनुप अशोकराव जगदाळे यांनी लिहिली असून पटकथा आणि संवाद अरविंद जगताप यांनी लिहिले आहेत. या सिनेमातील गाणी प्रसिद्ध संगीतकार ए.व्ही. प्रफुलचंद्र यांनी कंपोज केली आहे. या सिनेमात तीन गाणी आहेत. नुकताच मराठी फिल्मफेअर पुरस्कार मिळालेले गीतकार मंगेश कांगणे यांनी या सिनेमातील गाणी लिहिली आहे. त्यामुळे या दोघांच्या गीत संगीताचा एक वेगळाच अनुभव अनुभवता येणार आहे.
संगीतकार ए. व्ही. प्रफुल्लचंद्र यांनी अनेक मालिकांना आणि सिनेमांना संगीत दिले असून मंगेश कांगणे हे मराठी इंडस्ट्रीतील सध्याचे आघाडीचे गीतकार आहेत. मंगेश कांगणे यांचा गीतकार म्हणून हा ७५ वा मराठी सिनेमा आहे. तर या सिनेमातील गाणी आदर्श शिंदे, प्रविण कुंवर, ए.व्ही.प्रफुलचंद्र आणि सरोज बोधनकर यांनी गायली आहेत.
