‘योगायतन’चे मराठी चित्रपट निर्मितीत पदार्पण
योगायतन फिल्मने वेगळ्या विषयाला स्पर्श करणारा ‘परी हूँ मैं’ हा हटके मराठी सिनेमा प्रेक्षकांसाठी आणला आहे. बांधकाम, पायाभूत सुविधा यांसह विविध उद्योगक्षेत्रात आपला लक्षणीय ठसा उमटवणाऱ्या योगायतन समूहाने या चित्रपटाच्या निमित्ताने मराठी चित्रपट निर्मितीत पदार्पण केले आहे.
या सिनेमाचा मुहूर्त ‘योगायतन’ ग्रुपचे चेअरमन आणि चित्रपटाचे निर्माते डॉ. राजेंद्र प्रताप सिंह आणि संचालिका शीला राजेंद्र सिंह यांच्या हस्ते नुकताच दिमाखात संपन्न झाला. कलाकार व तंत्रज्ञ यांच्यासह विविध क्षेत्रातील मान्यवर याप्रसंगी उपस्थित होते.
रोहित शिलवंत दिग्दर्शित परी हूँ मैं या चित्रपटात एका मध्यमवर्गीय कुटुंबाचा ध्येयापर्यंतचा पॅशनेबल प्रवास मांडण्यात आला आहे. नंदू माधव, देविका दफ्तरदार, श्रुती निगडे, फ्लोरा सैनी हे दमदार कलाकार या चित्रपटात आहेत. चित्रपटाचा वेगळा विषय प्रत्येकाला नक्कीच भावेल असा विश्वास निर्माते डॉ. राजेंद्र प्रताप सिंह यांनी व्यक्त केला.
चित्रपटाची कथा इरावती कर्णिक यांची आहे. चित्रपटाचे छायांकन रोहन मडकईकर करणार असून संकलन ह्रीतेकेश मामदापूर यांचे असणार आहे. कलादिग्दर्शनाची जबाबदारी नरेंद्र भगत सांभाळणार आहेत. क्रिएटिव्ह प्रोड्युसर कुणाल मेहता आहेत. संगीत समीर साप्तीस्कर यांचे आहे. सहनिर्माता संजय गुजर असून कार्यकारी निर्माते भाविक पटेल आहेत. प्रोजेक्ट हेड भूषण सावळे आहेत.