समाजातील विषमतेवर भाष्य करणार
‘प्रेम’ आणि ‘कला’ या दोन गोष्टी अशा आहेत की ज्यांना जातीचं बंधन कधीच अडवू शकत नाही. प्रेमाची आणि कलेची सांगड घालत ‘ताटवा’ या सिनेमाची कथा गुंफली आहे.
एकीकडे ‘जात’ या संकल्पनेचे समूळ उच्चाटन करण्याचे भाष्य करत असताना जातीपातीचे राजकारण खेळणारी सुशिक्षित माणसं सभोवताली वावरताना दिसतात. याच विचारधारेवर प्रकाश टाकणारा ‘ताटवा’ हा नवा मराठी चित्रपट येत्या २६ मे रोजी प्रेक्षकांच्या भेटीला येत आहे.
‘शरयू आर्ट प्रोडक्शन’ निर्मित ‘ताटवा’ या चित्रपटाची निर्मिती डॉ. शरयू पाझारे यांनी केली असून दिग्दर्शन ज्येष्ठ अभिनेते अरुण नलावडे यांनी केलं आहे.
या चित्रपटाची कथा शिल्पा या पाथरवट समाजातील मुलीच्या जीवनावर बेतलेली आहे. दगडाचे पाटे, वरवंटे, खेळणी विकून शिल्पाचे कुटुंब उदरनिर्वाह करत असते. एका अनपेक्षित क्षणी लिखितचा तिच्या आयुष्यात प्रवेश होतो. त्यानंतर त्यांची प्रेमकहाणी कोणत्या वळणावर येऊन थांबते? जातीवादाचे चटके सोसून शिल्पा येणाऱ्या समस्यांवर कशी मात करते? हे पाहण्यासाठी २६ मे रोजी चित्रपट प्रदर्शित होण्याची वाट पहावी लागेल.
संजय शेजवळ आणि गौरी कोंगे ही नवी जोडी ‘ताटवा’ चित्रपटातून पदार्पण करत आहे. सोबत अरुण नलावडे, डॉ. शरयू पाझारे, देवेंद्र दोडके, डॉ. सरिता घरडे, विक्रांत बोरकर, नूतन धवणे, शीतल राऊत, सदानंद बोरकर, कमलाकर बोरकर, मंजुषा जोशी व बालकलाकार गौरी यांच्या भूमिका आहेत.
कला आणि प्रेम यासोबतच समाजातील विषमतेवर भाष्य करणाऱ्या शरयू आर्ट प्रोडक्शन निर्मित ‘ताटवा’ या चित्रपटाची निर्मिती डॉ. शरयू पाझारे यांची आहे. सहनिर्मिती विशाल रामटेके व स.कोंडबत्तुलवार यांनी केली आहे. विवेक कांबळे हे चित्रपटाचे कार्यकारी निर्माते आहेत.
चित्रपटाची कथा एम. कंठाळे यांनी लिहिली असून संवाद डॉ. शरयू पाझारे, डॉ. सरिता घरडे, सुरेश कांबळे, शैलेश ठावरे यांनी लिहिले आहेत. ज्येष्ठ छायाचित्रकार इम्तियाज बारगीर यांनी छायाचित्रणाची जबाबदारी सांभाळली असून संकलनाचे काम बी. म्हन्तेश्वर आणि रोहन सरोदे यांनी केले आहे. नाट्यलेखक व चित्रकार सदानंद बोरकर यांनी चित्रपटाचे कला दिग्दर्शक म्हणून काम पहिले आहे.
श्रीपाद भोळे लिखित या चित्रपटातील गीतांना संगीतकार अतुल जोशी, प्रशांत फासगे यांनी संगीत दिले असून गायक केवल वाळंज, सावनी रवींद्र, योगिता गोडबोले, अतुल जोशी, प्रसाद शुक्ल यांनी ती गायली आहेत. २६ मे ला ‘ताटवा’ चित्रपटगृहात प्रदर्शित होत आहे.