निखिल घोडके यांच्या कलाकृतींचे २ जुलैपासून प्रदर्शन
आशिया आणि युरोप या दोन खंडातील संस्कृती-संवाद, त्याचा मिलाफ ‘कनेक्शन’ या छायांकित प्रतिमांच्या वैविध्यातून अधोरेखित करण्यात आले असून, हे छायाचित्रांचे प्रदर्शन २ जुलैपासून ठाण्यातील कलादालनात सुरू होत आहे.
मूळचे ठाणेकर असलेले छयाचित्रकार निखिल घोडके हे सध्या न्यूयॉर्कजवळील मॅनहॅटनविल महाविद्यालयात प्राध्यापक आहेत. त्यांनी काढलेली छायाचित्रे या प्रदर्शनात मांडण्यात येणार असून, २ जुलैला सकाळी ११ वाजता या प्रदर्शनाचे उद्घाटन महाराष्ट्राचे निवृत्त चीफ आर्किटेक्ट वि. रा. अत्रे यांच्या हस्ते कलाभवन, कापूरबावडी, बिगबझारजवळ, ठाणे पश्चिम येथे करण्यात येणार आहे.
निखिल घोडके न्यूयॉर्कजवळील मॅनहॅटनविल महाविद्यालयात प्राध्यापक आहेत. ते चित्रपट व दूरचित्रवाणीशी संबंधित असलेले विविध तांत्रिक विषय अमेरिकेत शिकवतात. अध्यापनाबरोबरच कलादिग्दर्शनाच्या विविध जबाबदा-या त्यांनी अमेरिका आणि न्यूझीलंडमध्ये कुशलतेने सांभाळलेल्या आहेत. भारतातही ए. बी. पी. न्यूज व नेटवर्क १८ या समुहाबरोबर त्यांनी कामे केलेली आहेत.
अध्यापनातून उसंत मिळाल्यावर ते अनेक वेळा आशिया – यूरोपच्या अभ्यासदौऱ्यावर निघतात. ऐतिहासिक स्थळे व कलाक्षेत्रासाठी नावाजलेली जगभराची शहरें त्यांना खुणावतात. या स्थळांचे सौंदर्य आपल्या कॅमेऱ्यातून टिपण्यांत ते जी जाणकारी व सुक्ष्मता दाखवतात, ती त्यांच्या अनेक छायाचित्रात प्रतिबिंबीत झाली आहे. आजतागायत त्यांनी पूर्व-पश्चिमेत अठरा देशांना भेटी दिलेल्या आहेत. त्यांचे हे छायाचित्रण आपल्याला वेगळ्या विश्वात घेऊन जाते.
या चित्रप्रतिमा ताज्या ठसठशीत आहेत. रुढ चित्रणापेक्षा त्यांचे हे चित्रण थोडेसे वेगळॆ आहे. पर्यटकांच्या नजरेपेक्षा त्यांना काहीतरी जास्त जाणवते व ते आपल्या कॅमेऱ्याने नेमका तो वेगळेपणाच टिपतात, हे या प्रदर्शनात जाणवेल.
त्यांच्या दृक कलेला सामाजिकतेचेही भान आहे. जेव्हा एक आशियातील छायाचित्र युरोपच्या छायाचित्राशेजारी येते, तेव्हा या दोन कलाकृतीची तुलना होते. या दोन्हीमध्ये संवाद सुरू होतो. या दोन चित्रांमध्ये देवाणघेवाण चालते. हे संवाद प्रत्येक रसिकांच्या दृष्टीकोनातून वैविध्यपूर्ण असू शकतात, याच संवादाला उत्तेजन देणे हाच या प्रदर्शनाचा हेतू असल्याचे निखिल सांगतात.
निखिलच्या मते ‘जेव्हा तुम्ही एका व्यक्तीच्या छायाचित्राजवळ एक महागडी कार दाखवता, तेव्हा ते एक यशस्वी आणि श्रीमंत व्यक्तीची प्रतिमा मानली जाते. जेव्हा व्यक्तीशेजारी मोडकी स्कुटर असेल, तेव्हा ते सर्वसामान्य व्यक्तीचे चित्र वाटते. ही तुलना, रसिकांना आनंदाबरोबर विचार करण्यास प्रवृत्त करणे हाच ‘कनेक्शन’चा मुख्य हेतू आहे.’
प्रदर्शन स्थळ : कलाभवन, कापूरबावडी, बिगबझार जवळ, ठाणे पश्चिम
प्रदर्शन कालावधी : दिनांक २ ते ४ जुलै २०१६
वेळ : सकाळी १० ते संध्याकाळी ७