महामंडळाच्या पाठपुराव्याला सांस्कृतिक मंत्र्यांचा प्रतिसाद
अखिल भारतीय मराठी चित्रपट महामंडळाचे अध्यक्ष मेघराज राजेभोसले यांच्या नेतृत्वात एक शिष्टमंडळ नुकतेच सांस्कृतिक कार्य मंत्री विनोद तावडे यांना भेटले. या भेटीत मराठी सिनेसृष्टीला भेडसावणाऱ्या अनेक समस्यांवर तोडगा काढण्यासाठी मेघराज राजेभोसले आग्रही होते. आणि त्यांच्या मागणीला सांस्कृतिक मंत्री विनोद तावाडेंनीही तेवढाच सकारात्मक प्रतिसाद दिल्याने मराठी चित्र सृष्टीत चैतन्याचे वातावरण पसरले आहे.
मराठी चित्रपट महामंडळाच्या अध्यक्षांनी गेल्या ६ महिन्यापासून वारंवार विविध मागण्यांसाठी पाठपुरावा सुरु ठेवला होता, त्यात प्रामुख्याने खालील मागण्या होत्या.
१. चित्रपट अनुदानातील अनेक त्रुटी दुरुस्त करण्याची मागणी होती, तिला मंत्री महोदयांनी सकारात्मक प्रतिसाद दिला.
२. अनुदानासाठी अपात्र ६० पेक्षा अधिक सिनेमाबद्दल फेर विचार करण्याचे सूतोवाच तावडे यांनी दिला.
३. अनुदान योजनेसाठी अपात्र ठरलेल्या चित्रपटांपैकी सुरुवातीला १० चित्रपटांचे पुनर्परीक्षण करून ते योग्य वाटल्यास इतर अपात्र चित्रपटांचेही पुनर्परीक्षण करणार.
४. सिनेसृष्टीतील व्यावसायिकांसाठी ठराविक ठिकाणी प्लॉटची मागणी झाल्यास, तिथे आर्टिस्ट कॉलोनीसाठी शासन प्रयत्न करणार.
५. चित्रपट महामंडळाच्या व चित्रपटाच्या विकासासाठी कार्य करणाऱ्या विविध पदाधिकाऱ्यांना महाराष्ट्रातील विविध शासकीय विश्रामगृहात मोफत राहण्याची सुविधा उपलब्ध करण्याचे आश्वासन तावडे यांनी मान्य केले.
६.अखिल भारतीय मराठी चित्रपट महामंडळाच्या सुवर्ण महोत्सवी वर्षानिमित्त होणाऱ्या भव्य अश्या “अखिल भारतीय मराठी चित्रपट महोत्सव”करिता योग्य ते सहकार्य करण्यास शासनाची तयारी.
७. वयोवृद्ध कलावंतांना त्यांच्याच अकाऊंट मध्ये त्यांचे पेन्शन जमा करणार..पेन्शन ची रक्कम शासनाने वाढविली असून आता २१०० रुपये दिली जाणार.
८. मराठी चित्रपट जास्तीत जास्त प्रेक्षकांपर्यंत पोहचावे म्हणून, चित्रपट महामंडळासोबत मिळून विशेष योजना राबविणार.
९. प्रोविडेन्ट फंडच्या धर्तीवर सर्व मराठी तंत्रज्ञ व कलाकारांना पेन्शन योजनेसाठी शासनही मोठा हातभार लावणार. चित्रपट महामंडळातर्फे याबद्दलचा आराखडा लवकरच शासनाला देणार.
१०. चित्रपट प्रसिद्धी व चित्रपट महामंडळाच्या सुवर्ण महोत्सवी होणाऱ्या कार्यक्रमाचा आराखडा मराठी चित्रपट महामंडळ शासनाला देणार.
११. महाराष्ट्र शासनाच्या अखत्यारीत असलेल्या महाराष्ट्रातील बहुसंख्य नाट्यगृह मराठी सिनेमा प्रदर्शनासाठी देण्याच्या महामंडळाच्या मागणीलासुद्धा विनोद तावडेंनी सकारात्मक प्रतिसाद दिला.
विविध मागण्यांच्या प्रतीक्षेत असणारी मराठी चित्रपट महामंडळाच्या पदरात प्रथमच एवढ्या मोठ्या प्रमाणावर शासनाने सकारात्मक भूमिका घेऊन मराठी चित्रपटसृष्टीला पालक म्हणून सांभाळून मदतीचा हात दिला असल्याचे चित्र असून, मेघराज राजेभोसले व संचालक मंडळांच्या प्रयत्नांना मोठ्या प्रमाणावर यश आले आहे..
याबद्दल महामंडळाच्या अध्यक्षांनी संपूर्ण मराठी चित्रपट सृष्टीतर्फे सांस्कृतिक मंत्री विनोद तावडे यांचे आभार मानले. सदर शिष्टमंडळात चित्रपट महामंडळाचे अध्यक्ष मेघराज राजेभोसले यांच्यासोबत, महामंडळाचे संचालक सतीश रणदिवे, पितांबर काळे, वर्षा उसगावकर, कार्यवाहक विजय खोचिकर, चैत्राली डोंगरे तसेच महामंडळाचे सल्लागार व अभिनेते सुशांत शेलार उपस्थित होते.
शिष्टमंडळात चित्रसृष्टीतील अनेक मान्यवरांमध्ये निलकांती पाटेकर, रामदास तांबे, जेष्ठ दिग्दर्शक रमेश साळगावकर, अजय राणे, दिग्दर्शक ज्ञानेश्वर आंगणे, दिग्दर्शक अजित साबळे, गणेश तळेकर आदी उपस्थित होते..