स्वातंत्र्यदिनानिमित्त डोंबिवलीकरांचा सत्कार

काश्मिरमधील बारामुल्ला या संवेदनशील परिसरात कार्यरत असणाऱ्या महिला भूदल अधिकाऱ्याने स्वातंत्र्यदिनी सकाळी डोंबिवलीतील ओमकार इंटरनॅशनल स्कूलच्या प्रांगणात ध्वजारोहण केले. यावेळी विद्यार्थ्यांना समाजातील आदर्श व्यक्तिमत्वांची ओळख व्हावी याकरिता डोंबिवली परिसरातील काही आदर्श व्यक्तींचा सत्कार ओमकार इंटरनॅशनल स्कूल आणि एचएसबी एंटरप्रायजेसतर्फे करण्यात आला.

भारतीय लष्करामध्ये कॅप्टन पदावर कार्यरत असणाऱ्या डोंबिवली कन्या झांखना पासड यांच्या हस्ते ध्वजारोहण झाले.

सत्कारमूर्तींमध्ये आपल्या अंधत्वावर मात करुन कॅसिनो, तबल्यामध्ये ‘उस्ताद’ झालेला, राष्ट्रीय स्तरावर जलतरणपटू म्हणून नाव कमाविणारा, २०१४ साली राष्ट्रपती प्रणव मुखर्जींच्या हस्ते ‘बेस्ट क्रिएटीव्ह चाईल्ड’ पुरस्काराने गौरविलेला अवघ्या १६ वर्षांचा सिद्धार्थ सावंत, धडाडीच्या महिला पत्रकार म्हणून नावाजलेल्या राजलक्ष्मी पुजारे-जोशी, कला-क्रीडा-संस्कृती क्षेत्रात योगदान देणाऱ्या चतुरंग प्रतिष्ठानचे संस्थापक सदस्य किरण जोगळेकर, वैद्यकीय माध्यमातून सामाजिक क्षेत्रात कार्यरत असणारे डॉ. आनंद हर्डीकर आदी मान्यवरांचा समावेश होता.

कॅप्टन झांखना पासड यांच्या हस्ते या सत्कारमूर्तींना गौरविण्यात आले. यावेळी सिद्धार्थ सावंतने एक गाणे गायले. तर राजलक्ष्मी पुजारे- जोशी यांनी त्यांच्या पत्रकारितेविषयीचे अनुभव सांगितले. “आपला भारत देश जगातील सर्वांत चांगला देश आहे आणि तुम्ही मुले या देशाचे भविष्य आहात. आपल्या स्वातंत्र्यसैनिकांनी आपल्या प्राणांची आहुती देऊन भारताला इंग्रजांच्या गुलामगिरीतून मुक्त केले आहे. हे स्वातंत्र्य टिकविणे आणि आपल्या देशाला प्रगतिपथावर नेणे हे     प्रत्येक भारतीय नागरिकाचं कर्तव्य आहे” अशा रोमहर्षक शब्दांत कॅप्टन झांखना पासड यांनी आपल्या भावना व्यक्त केल्या.

“आजकालच्या मुलांना क्रिकेटपटू किंवा सिनेकलाकार रोल मॉडेल्स वाटतात. पण आपल्या आजूबाजूलादेखील आदर्श व्यक्तिमत्वे आहेत हे त्यांना उमजावं यासाठीच स्वातंत्र्यदिनाचं औचित्य साधून एचएसबी एंटरप्रायजेसने  डोंबिवलीतील या गुणीजनांचा सत्कार केला. या उपक्रमाचा पुढचा टप्पा म्हणून सर्वसामान्यांना अगरबत्तीचा इतिहास, प्रकार, गुणधर्म, शास्त्रीय दृष्टीकोन ज्ञात व्हावा या हेतूने २३ ऑगस्ट ते २८ ऑगस्ट दरम्यान आनंद भवन येथे अगरबत्ती महोत्सवाचे आम्ही आयोजन करीत आहोत. हा महोत्सव विनामूल्य असून सर्वांसाठी खुला आहे, असे एचएसबी एंटरप्रायजेसचे संचालक आशिष वैद्य यांनी सांगितले.

यावेळी ओमकार इंटरनॅशनल स्कूलचे यावेळी ओमकार इंटरनॅशनल स्कूलच्या मुख्याध्यापिका अर्चना परुळेकर यांनी कॅप्टन झांखना पासड ध्वजारोहणास आल्याबद्दल त्यांचे आभार मानले. चारही सत्कारमूर्तींना शुभेच्छा देत ही आदर्श व्यक्तिमत्वे मुलांना प्रेरणा देतील असा विश्वास व्यक्त केला.

यावेळी ओमकार इंटरनॅशनल स्कूलचे यावेळी ओमकार इंटरनॅशनल स्कूलच्या मुख्याध्यापिका अर्चना परुळेकर, ओमकार एज्युकेशन ट्रस्टच्या संस्थापिका सदस्य दर्शना सामंत, ओमकार इंग्लिश मिडीयम स्कूलचे विजया शेट्टी, अपर्णा वाघ, ओमकार केंब्रिज इंटरनॅशनल स्कूलच्या अनुजा नाईक, एचएसबी एंटरप्रायजेसचे संचालक आशिष वैद्य व नारायण वैद्य, साईस कन्सल्टन्सीचे संचालक केदार जोशी, टॅग इव्हेंट्सचे चिन्मय मडके आदी मान्यवर उपस्थित होते.