२१ रंगलेखक-शिल्पकारांचे कलाप्रदर्शन सुरु
नागपुरातील २५ ते ७५ वर्ष वयोगटातील २१ रंगलेखक-शिल्पकारांच्या कलाकृतींचे प्रदर्शन ‘आश्विन छटा’ नावाने मांडले असून, हे आयोजन ट्रान्सेडन्सने केले आहे. चित्रकार चंद्रकांत चन्ने निर्मित हे प्रदर्शन नागपुरातील धंतोली स्थित रामकृष्ण मठाजवळील शॅमेलिऑन कला दालनात १३ ऑक्टोबरपर्यंत सुरु राहणार आहे.
शॅमेलिऑन कला दालनातील हे उदघाटनीय प्रदर्शन असून, यात चित्रकला, ग्राफिक्स, छायाचित्रण, उपयोजित कला या सारख्या सर्व दृश्यकला आणि त्यांची विविध माध्यमातील कला व आधुनिक कला प्रवाह इथे सादर झाले आहेत.या प्रदर्शनाचे उद्घाटन ८ ऑक्टोबरला सुप्रसिद्ध वास्तुशास्त्रज्ञ हबीब खान यांच्या हस्ते झाले. ते म्हणाले, ‘ हे सर्व विविध वयाचे, विविध कलामाध्यम हाताळणारे कलाकार एकत्रितपणे बघणे हाच एक आनंदाचा क्षण आहे. नागपुरात अशा कलादालनाची आत्यंतिक गरज होती, टी या निमित्ताने पूर्ण झाली आहे.’
या प्रदर्शनात प्रमोदबाबू रामटेके, चंद्रकांत चन्ने, दीपक जोशी, रघु नेवरे, सुभाष बाभुळकर, अब्दुल गफ्फार, विवेक रानडे, विकास जोशी, रवि हेडाऊ, मंदार राव, संजय हरतालकर, बाबर शरीफ, सबीना हुसेन, ज्योती हेजीब, किशोर इंगळे, विनोद चव्हाण, हिमांशू खोरगडे, निखिल बोन्डे, अमित पांचाल, चंद्रशेखर वाघमारे आणि राहुल मेश्राम हे कलाकार सहभागी झाले आहेत. विविध विषयांची मांडणी आणि त्यातील आशय आणि अभिव्यक्ती, अमूर्त आणि वास्तविक शैलीची मांडणी, व्दिमिती आणि त्रिमितीच्या छटा, विविध संकल्पना, स्वप्न, विद्रोह, बालपण, पूर्ण, कृष्णधवल आणि रंग उधळण हे या प्रदर्शनाचे प्रमुख आकर्षण आहे.
